Түбән Кама ир-атларын сәламәтлекләрен тикшерергә чакыралар

Уролог беренче этапта пациент белән әңгәмә кора, аның зарларын тыңлый һәм диагноз куюга ярдәм итәрлек мәгълүматлар җыя. Репродуктив диспансеризацияне 18 яшьтән 49 яшькә кадәрге ир-атлар уза ала.

«Хирург һәм уролог консультациясеннән соң, икенче этапта спермограмма, микрофлорага анализ, ягъни инфекцияләргә ПЦР-тикшерү тапшырырга мөмкин. Әлбәттә, ниндидер тайпылышлар ачыкланса, уролог белән кабат консультация алырга мөмкин», — дип сөйләде Түбән Кама муниципаль районы сәламәтлек саклау идарәсе башлыгы Сергей Мерясев.

«Репродуктив сәламәтлекләрен хатын-кызлар да ел дәвамында теләсә кайсы эш көнендә тикшерә ала. Авыруны иртәрәк ачыклау профилактикалауны җиңеләйтә. Диспансеризация кысаларында ачыкланган куркыныч факторларны тормыштан алып ташлап, актив яшәүне дәвам итәргә мөмкин», — дип ассызыклады Сергей Мерясев.

Диспансеризация «Озын һәм актив тормыш» милли проекты кысаларында уза. Бу профилактик чараларның максаты – үлем һәм инвалидлыкның төп сәбәпләре булган авыруларны иртә стадияләрдә ачыклау. Быел Түбән Кама районында 110 мең кешене диспансеризация уздырырга планлаштырыла. Шуларның 37 меңенеке – репродуктив сәламәтлеген тикшерү.

Профилактик тикшерүләрне ике поликлиникада, шулай ук Актүбә урамы, 11нче йорт адресы буенча урнашкан консультатив-диагностика поликлиникасында – иртәнге 7дән көндезге 3кә кадәр узарга мөмкин.