Китаплар дөньясына мавыктыргыч сәяхәт

Фотода: балалар иҗади биремнәр белән шөгыльләнә / Фотолар шәхси архивтан

Китапханәче Викулова Оксана Михайловна балаларны бик җылы каршы алды, китапханә белән таныштырды. Ул китапханәдә үз-үзеңне тоту кагыйдәләре, китапка сакчыл караш турында сөйләде. Балалар китапларның киштәләрдә билгеле бер тәртиптә урнашуын, аларны өйгә алып укырга да, уку залында да файдаланырга мөмкин булуын белделәр.

Экскурсия барышында балалар китапханәнең ничек эшләве, китапларның укучыларга ничек юл табуы турында да кызыклы мәгълүмат алдылар. Китапханә хезмәткәрләренең хезмәте балаларда зур ихтирам уятты, күпләре ул һөнәргә кызыксынуларын белдерде.

Экскурсиянең икенче өлеше экология темасына багышланды. Балалар табигатьнең ни икәнлеге, кешенең табигатьнең аерылгысыз өлеше булуы турында фикер алыштылар. Экология фәне, аның төп кагыйдәләре турында кызыклы әңгәмә узды. Балалар «Һәр нәрсә бер-берсенә бәйле» дигән фикерне аеруча яхшы аңладылар.

Чара мультфильм карау, викториналар, табышмаклар һәм уеннар белән дәвам итте. Иҗади биремнәр вакытында балалар нокталар буенча рәсем ясап, урманнарда, елгаларда һәм болыннарда яшәүче җан ияләрен сурәтләделәр. Китапларның матур иллюстрацияләрен карау аларда зур кызыксыну уятты.

Аеруча «Кызыл китап» балаларда тирән тәэсир калдырды. Арадан берсе – Әлмир Яруллин – «Кызыл китап»ка кертелгән хайваннар турында үзенең белгәннәре белән уртаклашты, әти-әнисе белән тыюлыкка сәяхәте турында сөйләде.

Экскурсия балаларда уңай тәэсир калдырды. Алар китапханәдән китәргә ашыкмадылар һәм ата-аналары белән кабат килергә теләк белдерделәр.

Балаларны кечкенәдән китап дөньясына якынайту, экологик культура һәм укуга мәхәббәт тәрбияләү – бүгенге көндә аеруча мөһим. Балалар китапханәгә яңадан-яңа очрашуларга тагын да зур кызыксыну белән килерләр дип ышанабыз.