Кечкенәдән аңлатырга кирәк

– Ана кызы белән бу темаларга кайчан сөйләшергә тиеш?
– Мәгълүматны һәр бала төрле яшьтә төрлечә кабул итә. Әмма күрем вакыты турында кыз сыйныфташларыннан, дусларыннан түгел, ә әнисеннән белсә – әйбәтрәк. Шулай ук ни өчен сафлыкны сакларга кирәклеген әни кеше кызына 18 яшь тулганчы ук аңлатырга тиеш. Беренчедән, аны югалткач, кайтарып булмый. Икенчедән, җенси мөнәсәбәткә яраткан кеше белән генә керергә кирәк. Үсмер чакта һәр егет гомерлеккә бердәнбер юлдаш булып тоела. Шуңа күрә башны югалтып, хата ясарга ярамый. Бу вакытта игътибарны башка нәрсәгә юнәлтү, мәсәлән, укуда уңышларга ирешү әйбәтрәк булуын аңлатыгыз. 
Кызлар әниләренә тулысынча ышанырга тиеш. Аларга «җенси мөнәсәбәткә керү – начар» дию дөрес түгел. Бу бит - табигый әйбер. Кыз бала үсә һәм моңа рухи яктан да, физик яктан да әзер булырга тиеш. Шул ук вакытта саклану чаралары турында да аңлатыгыз. Еш кына яшь вакытта баласын төшереп, соңыннан озак дәваланырга туры килә. 
Мондый хатын-кызлар арасында ана булу бәхетеннән мәхрүм булганнары да бар. 
– Ана кеше кызын гинекологка беренче тапкыр кайчан алып барырга тиеш?
– Күп кенә хатын-кыз гинекологка күренергә яратмый. Бигрәк тә, элек ниндидер авырулар кичереп, озак дәваланучылар. Беренче мәртәбә әлеге табибка 16 яшьтә күренергә кирәк. Авыртулар барлыкка килсә, күрем белән проблемалар килеп чыкса, иртәрәк тә барырга була. Кайберләре балигълык вакытын көтә. Табибка кызыксындырган сорауларны бирергә, киңәш сорарга мөмкин. 
– Кыз баланы шәхси гигиенага ничек өйрәтергә?
– Һәрвакыт җылы су белән генә юыныгыз. Күрем вакытында ваннада юынмагыз, бассейнга яки башка сулыкларга кермәгез. Сөлгегез чиста һәм йомшак булырга тиеш. Синтетик тукымадан тегелгән эчке кием, сыланып торган чалбарлар кимәгез. Киңәшләрем барлык хатын-кызларга файдалы булыр дип уйлыйм. 
Алсу ЮМАТОВА.