Журналистлар Сабан туе

Тантаналы парад. НТР командасы хезмәттәшләрен сәламли. Колоннада - “Татмедиа”ның 70 филиалыннан килгән журналистлар. 98 – газета, 17 – журнал, 19 – телеканал, 79 – сайт. 600дән артык массакүләм мәгълүмат чаралары вәкилләре Питрәчкә җыела. “Медиа Сабантуй” – күмәкләшеп аралашыр, бәйрәм итәр өчен менә дигән мәйданчык, ди Айдар Сәлимгәрәев. 

"Бергә эшлибез, тик бер-беребезне күрмибез. Бергә бәйрәм итмибез. Ә монда күмәкләшеп, аралашып, бер-беребезне күреп бәйрәм итәбез", - ди “Татмедиа” Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев.

 

«Татмедиа» АҖ генераль директоры Шамил Садыйков газета-журналларның язылу кампаниясен уңышлы башкарып чыгулары турында әйтте. Иң яхшылары дипломнар белән бүләкләнде. Алдынгы филиаллар арасында безнең медиа-холдинг та бар. 

Мәйданда Сабан туе мохите. Милли кием кигән кызлар һәм егетләр җигүле атта бүләкләр җыя. Журналистлар күчтәнәчләр биреп кенә калмый, биеп-җырлап та күрсәтә. Капчык киеп йөгерү, чүлмәк вату, көрәш, кашык белән су ташу ярышларында журналистлар бик теләп катнаша. НТР хезмәткәрләре исә иң җитезләр рәтендә булып чыга. Аркан тартышуда – ир-атлар икенче урында, хатын-кызлар командасы – беренчелекне яулый. 

Медиа Сабантуй икенче тапкыр үткәрелә. Ярыш нәтиҗәләре буенча, НТР командасы 3 нче урынга лаек була. Коллектив смартфон алуга сертификат ота. Икенче урында – Тәтешнең “Авангард” газетасы. Беренчелек – “Мамадыш-информ” кулында.