Шигъри тәлгәшләр

Уйламыйча кердем йөрәгеңә,
Шаярганны үзем сизмичә,
Чын күңелдән якын итүеңне,
Күзеңдәге нурны күрмичә.

Ышанмадым, сөю аңлатканда,
Шаяртасың диеп уйладым,
Яратканны, шуңа шаяртканны,
Соңлап, ахры, соңлап аңладым.

Гафу сорыйм синнән 
                             үткәннәргә,
Яшьлек хатаң булдым гомергә.
Гафу итә алсаң, син гафу ит,
Була алмаганга гел бергә.

Чын күңелдән сиңа
                           бәхет телим,
Йөрәгеңдә сөю сүнмәсен,
Рәхәт яшә – сагыш, сагынулар,
Ялгызлыклар сине читләсен.
Роза ШӘЕХОВА.