Матур эшләребез калсын

Ел саен бу чараларда торак-коммуналь предприятиеләр, эшмәкәрләр, бюджет оешмалары, волонтерлар, ветераннар, студентлар һәм мәктәп укучылары катнаша. «Без утыртылган яшеллекне саклап та калырга тиеш, быел агачларның ябалдашларын тәртипкә китерәчәкбез», – диде Түбән Кама мэры Айдар Метшин. 
Быел план буенча 25 мең агач утыртылырга тиеш иде, шуларның 5 меңе язын утыртылган, калганнары – көзен. Ике атна узгач, ялганып, ныгып китсен өчен, үсентеләргә су сибәчәкләр. Һәр кеше шәһәр тарихында үз эзен калдыра ала. Моның өчен ишегалдында агач утырту җитә. 
«25 мең агачның 3-4 процентын гына югалтсак, куркыныч түгел. Әмма саклап калырга тырышырга кирәк. Агачлар яңа микрорайоннарда да утыртылырга тиеш. Берничә дистә елдан анда да парклар булыр», – дип ассызыклады Айдар Метшин. 
8-14 сентябрьдә Татарстанда «Урман атнасы-2018» акциясе узачак. Аңа Түбән Кама да кушылачак. Бу вакытта урманнарда чүп-чар җыелачак, ял урыннары тәртипкә салыначак һ.б. эшләр башкарылачак.  Красный Ключта 300 каен үсентесе утыртылачак, Мурадьян урамы буендагы урман да агачлар белән баетылачак.