Иң борынгысына – 119 ел

«Биредә кешеләрнең үлү сәбәпләре дә язылган. Ул вакытта кешеләр гади авырулардан үлгәннәр, мәсәлән, сабыйлар еш кына кызамык авыруын кичерә алмаган. Метрика китапларының берсе консисторийга җибәрелгән, икенчесе чиркәүдә яки мәчеттә сакланган. Алар буенча нәсел шәҗәрәсен дә төзеп була», – дип аңлата Түбән Кама муниципаль районы архивы начальнигы Зөлфия Зиннәтуллина. 
Шәһәр архивында 186 метрика китабы саклана. Иң борынгысына – 119 ел. Документларның күпчелеге гарәп телендә. Аларда Шәңгәлче, Тоба, Ерыклы, Сименеево, Уратма, Түбән һәм Урта Чаллы, Каенлы, Кече һәм Зур Аты авыллары кешеләре турында мәгълүмат теркәлгән. Кайбер авыллар Уфа губернасына кергән. Иң мөһиме: әлеге хәзинәне саклап калу, чөнки күп кенә документлар таушалган. Моның өчен хәзерге вакытта 186 китап компьютерга күчерелә. Аннары һәр теләгән кеше фотолар буенча шәҗәрәсен төзи алачак.
Архивта барлыгы 85 мең документ саклана, шуларның 56 меңе – эшкә кабул итү, эштән китү, эш хакы түләнү турында. Аларны да компьютерга кертергә кирәк булачак, чөнки пенсиягә чыгучылар еш мөрәҗәгать итә. 
Биредә шулай ук уникаль фотолар, фронттан килгән хатлар, газеталар тегелмәләре һ.б. тупланган. Зөлфия Зиннәтуллинаның планнары зурдан. Шуларның берсе – республика гранты оту. Шулай ук архивта мәктәп укучылары һәм олылар  белән эшләү проектын тормышка ашырырга ниятлиләр. Аннары күп кенә җиһазлар да җитми. Мәсәлән, әлегә компьютерга зур булмаган документлар күчерелә, ә зур документларны күчерү өчен А2 форматындагы сканер кирәк. Ә ул 480 мең сум тора.
Лилия ЗАҺРЕТДИНОВА.