Гаиләсенә дә, һөнәренә дә тугры ул
Үзәк хастаханәсенең нур ярдәмендә диагноз кую бүлегендә рентген лаборанты булып хузмәт куючы Гөлфирә Миңкәшева медицинага 25 ел гомерен багышлаган. Быел ире Данил белән дә алар көмеш туйларын билгеләп үткәннәр.
25 ел элек 18 яшьлек Гөлфирәне тулай торак кухнясында күреп алган Данил уңганлыгына сокланып, сүз каткан. Икесе дә Үзбәкстаннан икән, бер-берсен тиз арада үз иткәннәр. Туй белән дә сузып тормаганнар, өч айдан яңа гаилә туган. Данил химия комбинатында аппаратчы булып эшли башлаган, хатыны – хастаханәдә санитар, соңрак белем алып, рентген лаборанты һөнәрен үзләштергән. Гаилә бизәге – кызлары Динара һәм уллары Рөстәм туган.
Гөлфирә Миңкәшева үзен бәхетле кеше итеп саный. Аның әнисе дә озак еллар хастаханәдә санитар булып эшләгән. Гөлфирә ханым да медицинаны сайлаган, һөнәрен кешеләргә файда китергәне өчен ярата.
«Гаиләнең бәхете нидә?» дигән сорауга ул:
– Сабыр булырга, бер-береңне кичерә дә белергә кирәк. Ир белән хатынның уртак кызыксынулары да булырга тиеш. Без, мәсәлән, табигатьне яратабыз, авылда үз хуҗалыгыбыз бар. Мин иремне тыныч, акыллы, ихтирамлы булганы өчен бик яратам. Еллар үткән саен, без якынаябыз гына. Аның миңа һәрвакыт ярдәмгә киләчәген беләм, – дип җавап бирде.
Миңкәшевләрне «Көмеш туй»лары белән ЗАГС идарәсендә дә котлаганнар. Тантанада әти-әниләре, балалары, туганнары катнашкан. Эштән исә консультация-диагностика поликлиникасының нур ярдәмендә диагноз кую бүлеге мөдире Андрей Пронин, профсоюз комитеты рәисе Рәзидә Шәмсетдинова килеп, тәбрикләү сүзләре җиткергәннәр. Гөлфирә ханымның әти-әнисе исә киләсе елда алтын туйларын билгеләп үтәчәкләр.
Фото Миңкәшевларның шәхси архивыннан.
Иң мөһим һәм кызыклы язмаларны Татмедиа Telegram-каналында укыгыз
