Дерматофития һәм аның профилактикасы

Дерматофития, нигездә, микроспория (баш тиресе һәм чәч зарарлана) һәм трихофития (тимрәү) авыру сәбәпле килеп чыга. Кеше сәламәтлегенә куркыныч тудыручы 30 төр гөмбә бар. Йоктыру да төрле юл белән булырга мөмкин: авыру хайваннар, кешеләр яки зарарланган су, туфрак аша. Гөмбәләрнең кайбер төрләре дымлы урыннарда, мәсәлән, җәмәгать коену бүлмәсендә, мунчада, чишенеп-киенү бүлмәсендә үрчи. Иммунитет көчсез булса, дөрес тукланмасагыз, мунчада, саунада һәм бассейнда гигиена таләпләрен үтәмәсәгез, авыруны йоктыру бик җиңел.
Дерматофития белән авырмас өчен нишләргә? Беренче чиратта куркынычсызлык кагыйдәләрен үтәргә өйрәнегез. Шәхси гигиена әйберләрен һәм аяк башмакларын беркемгә бирмәгез. Аяк киемен һәрвакыт чиста тотыгыз, җылы вакытта ачык, һава керә торганын сайлагыз. Киемне дә табигый тукымадан тегелгәнен киегез, синтетика тирне үзенә сеңдерми, өстәвенә, аллергия китереп чыгарырга да мөмкин, димәк, гөмбә һәм бактерияләр үрчү өчен уңай шартлар туа. Дөрес һәм җитәрлек тукланыгыз, йокыгыз туйсын. Хуҗасыз хайваннарга үзегез дә кагылмагыз, балаларыгызны да бу хакта кисәтеп куегыз. Авыру билгеләрен күрүгә, табибка мөрәҗәгать итегез. Сәламәт булыгыз!
«Медицина профилактикасы үзәге»нең гигиена тәрбиясе табибы Илмир ВӘЗИКОВ.