Балалары хакына савыккан
Дүрт бала анасы Наилә Алексеева ике яклы пневмония авыруын җиңгән.
Коронавирус инфекциясе йогу нәтиҗәсендә башланган авыру үпкәләрне тулысынча зарарлаган.
Наилә Алексеева әйтүенчә, савыгуга өмет аз булган, әмма табиблар ярдәме һәм яшәү теләге чирне җиңәргә ярдәм иткән. Ул шушы көннәрдә госпитальдән кайткан һәм өендә дәвалануны дәвам итә.
– Башта тән температурасы күтәрелде. Берничә көн буе төшмәгәч, өйгә терапевт чакырттым. Антибиотиклар, вируска каршы дарулар язып бирделәр, әмма аларны кабул итсәм дә, хәлем начарайды гына, – дип сөйли Наилә. Нә-тиҗәдә, аны госпитальгә алып киткән-нәр. Томография үпкәләрнең 90 процентка зарарлануын күрсәткән.
Дәвалау ярдәм итмәгәч, анестезиолог-реаниматолог Дмитрий Чайко аны ясалма сулыш алу аппаратына тоташтырырга карар иткән. Ул вакытта авыру инде аңсыз булган.
Табиблар көне-төне Наилә гомере өчен көрәшкән. Бәхеткә, бер атнадан хатын аңына килгән һәм үзе сулый башлаган.
– Үзең сулый алу чын бәхет икән ул! Көндәлек тормышта бу хакта уйланмый да идем. Барлык медицина хезмәткәрләренә рәхмәтемне белдерәм, – ди Наилә. Табиб әйтүенчә, аның савыгуы әле яшь булуы белән дә бәйле.
Коронавирус очраклары саны кимүгә таба барса да, госпитальдә ятучылар күп әле. Шушы көннәрдә генә Татарстанда бу авырудан ике кеше үлгән.
Иң мөһим һәм кызыклы язмаларны Татмедиа Telegram-каналында укыгыз
