Туган як

"Без төрле! Без бердәм!"

Агымдагы елдан “Апуш” балалар үзәк китапханәсендә шул исемдәге проект тормышка ашырыла башлады. Әлеге проект кысаларында китапханәдә “Халыклар дуслыгы” ункөнлеге игълан ителде. Узган атнада аны зур чара белән тантаналы рәвештә ачып җибәрделәр.

Кичә театральләшерелгән тамаша белән башланып китте. 93 нче балалар бакчасына йөрүче сабыйлар кунакларга милли киемнәр тәкъдим иттеләр, алар турында кызыклы итеп сөйләделәр дә әле. “Йолдызлык” курайчылар ансамбле чыгышы, “Әллүки” ансамбле җырчылары башкарган халык җырлары кичәнең матур бизәгенә әверелде. “Түбәтәй”, “Овтонь”, “Вумурт” халык уеннары күңелгә дәрт өстәде, бәйрәмне матур төсләр белән баетты. Чара ахырында барлык катнашучылар зур түгәрәккә басып, әйлән-бәйлән әйләнделәр.

Сүз уңаеннан, узып киткән 2021 ел “Апуш” балалар үзәк китапханәсе өчен нәтиҗәле ел булды. Ноябрь аенда ТР Мәдәният министрлыгы оештырган проектлар бәйгесендә катнашып, җиңү яулаган иде алар. “Без төрле! Без бердәм!” проекты әнә шул грант акчасына гамәлгә ашырыла. Балаларны һәм яшүсмерләрне төрле халкыларның мәдәниятләре белән таныштыру, гореф-гадәтләребезне онытмау, ихтирам, хөрмәт хисләре тәрбияләү китапханәбез эшендә мөһим юнәлешләрнең берсе булып тора.

Проект мәктәпкәчә яшьтәге балаларга һәм аларның әти-әниләренә исәпләнгән. “4-5 яшьтә сабый үзенең билгеле бер милләт вәкиле булуын аңлый башлый, күңелендә гаилә традицияләренә кызыксыну уяна. Нәкъ менә шуның өчен дә шушы вакытны кулдан ычкындырмаска кирәк”, – ди китапханәчеләр.

 

Гүзәл Хәсәнова,

Түбән Кама китапханәләр берләшмәсе директорының балалар эшләре буенча урынбасары.

 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: