Туган як

Китаплары кызыклы да, файдалы да

Эльмира Әбүбәкерова яшьләр идарәсендә хезмәт куя. Ире белән ике бала үстерәләр. Улы Әмир 2 нче сыйныфта укый, ә кызы балалар бакчасына йөри. Кызы белән декрет ялында утырганда, Эльмира сабыйлар өчен махсус китаплар белән кызыксына башлый. Соңрак интернет аша аларны үзе тегәргә өйрәнә.

– Мондый китаплар сабыйлар өчен кызыклы һәм файдалы да: «рәсемнәр»е ачык төстә һәм матур, аларны алырга һәм кире беркетергә мөмкин. Аны хәтта уенчык дип атап була, – дип аңлата Эльмира.
«Китап – белем ачкычы», дип юкка гына әйтмиләр. Кечкенә балалар дөньяны әти-әниләренең телефоны, телевизор, компьютер аша түгел, ә нәкъ менә китап аша танып белергә тиеш, дип саный Эльмира да. Ә бу китапларны «укы»ганда, бармаклар ныгый, акыл сәләте үсә, вак моторикага да игътибар бирелә.
Әлбәттә, мондый китаплар өчен иң сыйфатлы чимал гына кулланыла. Эльмира «рәсемнәр»ен корея фетрыннан тегә. Аннан аллергия дә юк икән. Өлгеләрен дә я үзе уйлап чыгара, я интернеттан ала.
–Аннары китап битләрен әзерлим. Аларны тукымадан тегәм, төсен уңдырмый торган махсус сабын белән юам. Битләр эченә дублерин тыгам. Өлгене фетрга ябыштырып, кисәм, «рәсемнәр»не биткә беркетә барам, – ди Эльмира.
Ул бармак театры өчен геройлар да, йомшак шалтыравыклар да тегә. Кичен ата-ана бала белән рәхәтләнеп «Шалкан» әкиятен күрсәтә ала. Шалтыравыклары ватылмый, димәк, эчендәге әйбере коелып, бала авызына кабу куркынычы юк.
Эльмира декрет ялыннан эшкә чы-гарга әзерләнә. Әмма бу шөгылен дә ташларга җыенмый: «Яраткан эшкә вакытны һәрчак табып була. Китап теккәндә, тынычланам, авыр уйлардан арынам», – ди.

Лилия Заһретдинова

Фото: шәхси архивтан

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: