Түбән Каманың махсус операция ветераннары солдат язмышлары турында җырлар башкардылар

Барысы да – тормыштан алынган. «Добробат» төркеме түбәнкамалылар алдында чыгыш ясады. Әлеге коллектив махсус хәрби операция ветераннарыннан тора.

Сәхнәдә – «Добробат» төркеме солитстлары. Иван Хомяков белән Марат Сәйфуллин – 2022 елда махсус хәрби операция зонасында танышканнар. Соңрак музыкаль коллектив оешкан. Хәзер автомат урынына кулларында – микрофон.

Шигырь юллары –  күңелгә үтеп керерлек. Барысы да – тормыштан алынган. Җырлары –  хәрбиләрнең сугышта күрсәткән батырлыклары, язмышлары  турында. Үзләре иҗат итәләр, үзләре башкаралар. Репертуарда  берничә дистә җыр. Әниләр темасы – иҗатларында аерым урынны алып тора.

Залда утыручылар – Ватанны саклаучыларның ата-аналары, хатыннары –  һәр чыгышны көчле алкышларга күмәләр. Музыкаль төркем гастрольләргә дә еш чыга. Бергә хезмәт иткән дусларын күреп- хәлләрен белешү төп бурыч, диләр.