Түбән Камада совет гаскәрләрен Әфганстаннан чыгару көненә багышланган митинг узды

Түбән Камада 15 февральдә Совет гаскәрләрен Әфганстан Республикасыннан чыгаруга 36 ел тулу уңаеннан тантаналы чара узды.

«Бу истәлекле дата Ватаннан читтә хәрби бурычларын үтәгән ватандашларыбызга багышлана», — дип билгеләп үттеләр шәһәр администрациясенең матбугат хезмәтендә.

Митинг традиция буенча сугышчы-интернационалистларга һәйкәл янында узды. Әфганстандагы конфликт 15 меңнән артык совет солдатының гомерен алып киткән.

«Без Ватан мәнфәгатьләрен яклап гомерләрен биргән сугышчы-интернационалистларның батырлыгын хөрмәт итәбез һәм сугышчан хәрәкәтләр ветераннарына тирән ихтирамыбызны белдерәбез. Аларның һәрберсе Ватанга намус һәм кыюлык белән хезмәт итте», — диелә хәбәрдә.