Түбән Камада сабыйлар үлеме дәрәҗәсе кимегән

2024 елда Түбән Кама перинаталь үзәгендә 2 172 бала туган, сабыйлар үлеме күрсәткече исән туган 1 000 балага 2,5 тәшкил иткән, бу 2023 ел белән чагыштырганда 0,5 промиллегә кимрәк. Бу хакта перинаталь үзәге булган балалар хастаханәсе баш табибы Алексей Толстиков йомгаклау медсоветында хәбәр итте.

Моннан тыш, 2024 елда хастаханә штатын 26 табиб тулыландырган.

«Белгечләр әзерләү буенча белем бирү оешмалары белән актив эш үткәрелә, югары һәм урта уку йортлары студентларын максатчан юнәлеш буенча укыту алып барыла. Шулай ук яшь белгечләргә ярдәм итүнең төрле программалары эшли: аренда торагы бирү, Татарстан Республикасы Хөкүмәте грантлары, «подъёмныйлар», бер тапкыр бирелә торган түләүләр», — дип билгеләп үтте Толстиков.