Түбән Камада йортларны капиталь төзекләндерүгә 700 миллион сумнан артык акча юнәлдереләчәк

Түбән Кама районы башкарма комитеты җитәкчесе урынбасары Максим Парамонов 2025 елга бюджет турында доклад белән чыгыш ясады.

Торак йортларны капиталь ремонтлауга җирле бюджеттан 104 млн 507 мең сум бүлеп бирү планлаштырыла. ТР бюджеты һәм бина милекчеләре акчалары белән бергә бу сумма 735 млн 902 мең сум тәшкил итәчәк. Акча төзелеш-монтаж эшләренә, проектлауга һәм төзелеш контроленә тотылачак.

Өзлексез транспорт хәрәкәте өчен шәһәрдә урамнарны, юлларны һәм магистральләрне санитар чистарту буенча 154 млн 003 мең сумлык эшләр планлаштырылган.

Шулай ук иминлекне гамәлгә ашыру һәм халыкны яклауны финанслау турында фикер алыштылар. 59 миллион җәмәгать тәртибен саклауга, 16 миллион гражданнар оборонасына, тагын 5әр — янгын куркынычсызлыгына һәм бердәм диспетчерлык хезмәтләре эшенә юнәлдереләчәк.

Азакта яшүсмерләр клубларының эшчәнлек нәтиҗәлелеген һәм муниципаль милекне куллануны тикшерүгә йомгак ясалды. Барлыгы 46 хокук бозу очрагы табылган.