Түбән Камада иң яхшы Яңа ел бизәлешенә конкурс башланды

Түбән Камада иң яхшы Яңа ел бизәлешенә конкурс игълан ителде. Гаризалар 22 декабрьдә кабул ителә.

Бәйгедә катнашуга шәһәр халкы, оешма-учреждениеләр, кибетләр чакырыла. Фото- һәм видеоматериаллар белән гаризалар ng-art-NK@yandex.ru адресы буенча кабул ителә. Җиңүчеләрне дипломнар һәм призлар белән бүләкләү 2025 елның гыйнварында булачак.

Конкурс түбәндәге номинацияләрне үз эченә ала:

• «Яңа ел балкышы» — биналарның, агачларның, киртәләрнең фасадларын утлар белән комплекслы бизәү;
• «Кышкы йорт» — йорт яны территорияләрен бизәү;
• «Тылсым ясыйбыз» — учреждение һәм оешма биналарының тәрәзәләрен бизәү (чыршы шарларын, яктылык гирляндаларын куллану рөхсәт ителә);
• «Могҗизаларга ышаныйк» — дәүләт һәм муниципаль предприятиеләр һәм учреждениеләр фойесын бизәү;
• «Яңа ел — яңа шатлыклар» — сәүдә залларын бизәү;
• «Бәйрәм безгә килә» — подъездларны бәйрәмчә бизәү;
• «Минем тылсымлы кышкы шәһәрем» — фотоконкурс (Яңа ел җитүенең якты мизгелләрен һәм кышкы шәһәрнең матурлыгын чагылдырган оригиналь фотографияләр);
• «Могҗизалар көткәндә» — учреждениеләрдә, урамда яки өйдә Яңа ел чыршысын бизәү;
• «Әкиятләр әйлән-бәйләне» — балалар һәм аларның ата-аналары тарафыннан бизәлгән Яңа ел чыршысы.