Түбән Камада гриппка каршы вакцинация башланды

Түбән Кама балалар район хастаханәсендә прививка ясату кампаниясе башланды. Хастаханәнең матбугат хезмәтендә сөйләүләренчә, беренче булып гриппка каршы прививканы медицина хезмәткәрләре ясаткан. 1 августта 97 хезмәткәргә «Утрикс Квадри» препараты белән прививка ясалган.

«Бу аларга авыруны җиңелрәк кичерергә һәм авыруның катлаулану куркынычын киметергә ярдәм итәчәк», — дип билгеләп үттеләр хастаханәдә.

Табиблар әйтүенчә, 6 айлык балаларга, өлкән яшьтәге кешеләргә, йөкле хатын-кызларга, шулай ук хроник авырулы пациентларга прививка ясату аеруча мөһим. Өстәвенә, моны эпидсезон башланганчы эшләргә кирәк.