Түбән Кама районында сезон башыннан 12 тапкыр үлән янган

Түбән Кама шәһәрендә һәм районында инспекторлар инде үлән януның 12 очрагын теркәгән.

Янгын куркынычы югары булган чор яз уртасында һәм ахырында башлана, ул вакытта җирне коры үлән һәм яфраклар каплый. Статистика буенча, табигый янгыннарның 90 проценты кеше гаебе белән килеп чыга, дип искә төшерәләр түбәнкамалыларга.

Янгыннар булмасын өчен гади кагыйдәләрне үтәргә кирәк:

• Үләнне һәм яфракларны яндырмаска — бу законсыз булудан тыш, утның тиз таралуына да китерә;
• Сүндерелмәгән тәмәке һәм шырпы ташламаска — хәтта кечкенә очкын да зур янгын чыгарырга мөмкин;
• Учакларны рөхсәт ителгән урыннарда гына ягыгыз, ә корылык вакытында һәм көчле җил булганда учаклардан баш тартыгыз;
• Китәр алдыннан учакны яхшылап сүндерергә — су салырга, күмерләрне болгатырга, бернәрсәнең дә янмавын кат-кат тикшерергә;
• Урманда пыяла һәм янучан калдыклар калдырмаска — алар янгын чыгарырга мөмкин.

Ут чыгуны күргән очракта шунда ук 112 яки 101гә шалтыратырга.

Искәртәбез, Татарстанда урманнарда янгын куркынычы сезоны гамәлдә. Янгын куркынычсызлыгы кагыйдәләрен бозган өчен гражданнарга — 30 мең сумга кадәр, вазифаи затларга — 50 мең сумга кадәр, юридик затларга 400 мең сумга кадәр штраф салынган. Әгәр хокук бозу махсус янгынга каршы режим шартларында кылынган икән, бу очракта административ штраф күләме арта һәм гражданнар өчен 50 мең сумга кадәр, вазифаи затлар өчен — 90 мең сумга кадәр, юридик затлар өчен — 1 млн. сумга кадәр тәшкил итәчәк.

Фото: t.me /_d_nk