Түбән Кама идарәче компаниясе директоры урынбасарына 120 мең сумлык штраф билгеләнгән

Татарстан Дәүләт торак инспекциясе Түбән Каманың «Жилье» идарәче компаниясе директоры урынбасарына ике йортның подвалы начар хәлдә булган өчен штраф билгеләде.

Түбән Кама инспекторлары биредә яшәүчеләрнең шикаятьләре буенча Тынычлык проспектындагы 105нче йортны һәм Вокзал урамындагы 28нче йортны тикшергән. Барлык сигналлар расланды, дип хәбәр итә Татарстан Дәүләт торак инспекциясенең матбугат хезмәте.

Тынычлык проспектындагы 105 нче йорт подвалында канализация сулары җыелып тора, шул сәбәпле монда начар ис бар. Вокзал урамы, 28 адресы буенча подвалда инспекторлар төзелеш һәм көнкүреш чүп-чарларын, канализация суы аккан эзләрне, канализация системасы торбалары астында терәкләрнең булмавын, салкын су белән тәэмин итү торбаларының асылынып торуын һәм башка хокук бозуларны тапканнар.

Административ хокук бозулар Кодексының 14.1.3 маддәсенең 2 өлеше буенча «Жильё» идарәче компаниясе директоры урынбасарына 120 мең сумлык штраф билгеләнә.