Түбән Кама янгын сүндерүчеләре дача массивларында рейдлар үткәрәчәк

Республикада 14 апрельдән янгынга каршы махсус режим кертелде. Монда профилактика эше зур роль уйный. Территорияләрне коры-сарыдан һәм чүп-чардан чистартырга, сөрергә, минераллаштырылган полосаларны яңартырга кирәк. Соңгы айда гына да Түбән Кама районы территориясендә коры-сары янган 43 очрак теркәлгән. 

«Шулай ук гражданнар һәм юридик затлар тарафыннан төзелеш һәм көнкүреш чүп-чарларын, яфракларны һәм коры үләнне яндыруны тыю өлешендә төзекләндерү кагыйдәләрен үтәүгә контрольне көчәйтергә кирәк, шул исәптән предприятиеләрнең һәм шәхси йортларның эчке территорияләрендә. Хокук бозучыларга карата административ йогынты чаралары кулланылачак», — дип хәбәр итте Түбән Кама муниципаль районының күзәтчелек эшчәнлеге бүлеге башлыгы Рамил Насыйбуллин.

Янгын сүндерүчеләр тарафыннан тәртип бозучыларны ачыклау буенча рейдлар оештырылачак, шул исәптән дача массивларында да.