Түбән Кама автоинспекторлары ике малайның яңа ел теләген тормышка ашырган

Түбән Кама дәүләт автоинспекциясе хезмәткәрләре физик мөмкинлекләре чикләнгән ике малай — Мирон Нагуманов һәм Әскәр Бәдертдиновның күптәнге хыялларын тормышка ашырганнар.

Балалар автоинспекторлар белән берлектә патруль машинасында йөрергә күптән хыялланганнар. Яңа ел алдыннан аларның бу хыялы тормышка ашкан: малайлар ДАИ эше белән якыннан танышканнар, патруль автомобиленә утырып йөргәннәр һәм, әлбәттә, инспекторлар кулыннан бүләкләр дә алганнар. 

«Бу очрашу балаларга шатлык һәм хыялларның тормышка ашуына ышаныч бүләк итте», — диләр шәһәр дәүләт автоинспекциясендә.