Татарстанда туган телләрдән төп дәүләт имтиханын сайлаган укучылар саны арткан

Быел туган телләр буенча төп дәүләт имтиханын тугызынчы сыйныфны тәмамлаучы 5,8 меңнән артык укучы (шуларның 5,6 меңнән артыгы — татар теленнән) сайлаган. ТР мәгариф һәм фән министры Илсур Һадиуллин ТР Хөкүмәте йортында узган брифингта шул хакта хәбәр итте, дип яза «Татар-информ» хәбәрчесе Надежда Гордеева.

«Бу узган ел белән чагыштырганда 1 751 балага күбрәк. Татар теленнән имтихан тапшыру буенча Казан, Чаллы, Яшел Үзән, Азнакай, Түбән Кама, Питрәч һәм Арча районнары алда бара. Республика буенча уртача билге узган ел белән чагыштырганда тотрыклы», — дип сөйләде ул.

Унберенче сыйныф укучылары арасында туган телдән бердәм республика имтиханын 32 укучы сайлаган. Узган ел җиде кеше имтихан тапшырган булган.

«Имтихан тапшыручылар — Казан, Чаллы, Түбән Кама, Бөгелмә, Актаныш, Әтнә, Биектау, Кайбыч, Мөслим һәм Чистай районнары укучылары», — дип искәртте ТР мәгариф һәм фән министры.

Аның сүзләренчә, яшьләрнең туган телләргә карата кызыксынуы арта.

«Һәр халыкка үз туган теле кызыклы. Кешеләрнең үзаңы үсә, балалар туган телне белергә кирәклеген аңлый. Һәм без моның шулай булуына шат. Моны безнең хезмәтебез, куйган тырышлык нәтиҗәсе дип саныйм. Бу юнәлештә даими эш алып барыла», — дип сүзен төгәлләде Һадиуллин.