Татарстанда кар кайчан эреп бетәчәк? Татарстанның Гидрометеорология үзәге башлыгы фаразы

Татарстанда кар катламының тулысынча юкка чыгуын алдагы 20 көн эчендә көтәргә кирәкми. ТР Гидрометеорология һәм әйләнә-тирә мохитне күзәтү идарәсе башлыгы Феликс Гоголь «Татар-информ» агентлыгына шул хакта хәбәр итте.

Синоптик сүзләренчә, төбәктә карның тулысынча эреп бетү вакыты 9 апрельдән 17 апрельгә кадәрге чорга туры килә. Гоголь узган кышның, бигрәк тә республика көнбатыш районнары өчен, рекордлы карлы булуын искәртте. Мисал өчен, Яшел Үзән районында кар көртләренең биеклеге 105 смга, ә Казанда — 91 см җиткән.

Хәзерге вакытта кар катламының биеклеге әкренләп кимүгә барса да, киләсе 10 көндә явым-төшем көтелмәсә дә, карның зур запаслары әле озак вакыт эриячәк. Метеокүзәтүләр тарихында Татарстанда карның иң соң эреп бетүе май ахырында теркәлгән.