Татарстанда июнь уртасы нормадан биш градуска эссерәк була

Татарстанда июнь аеның икенче декадасында уртача һава температурасы климат нормасыннан биш градуска югарырак булачак. Татарстанның Гидрометеорология үзәге шундый фараз чыгарды.

Республика буенча 11-20 июньдә климат нормасы — 18,0 градус тәшкил итә, дип билгеләп үтә синоптиклар.

Моңарчы метеорологлар Татарстанда бу атнада 35 градус эссе булачагы турында әйткән иде.

«Татар-информ» хәбәр иткәнчә, КФУ профессоры, география фәннәре докторы Юрий Переведенцев быелгы җәйнең экстремаль эссе булу-булмавы турында фараз ясады һәм ТР башкаласында аномаль эссе декада күзәтелүе турында кисәтте.