Татарстанда бер көнгә 24 градуска кадәр җылыта, ә соңыннан аномаль салкыннар килә

Бу атнада Татарстанда кыска вакытка җәйгечә җылы булып алачак, әмма аннан тиз арада суыта, ә ялларда аномаль салкын һава торышы көтелә. Бу республиканың Гидрометеорология һәм әйләнә тирә мохитне күзәтү идарәсе фаразларыннан күренә, дип яза «Татар-информ».

Бүген, 8 октябрьдә, республика кичәге циклонның җылы секторында кала һәм ул әкренләп көнчыгышка таба күчә башлый. Көньяк һава агымнары температураның сизлерлек җылынуына китерә: төнлә 6-11, ә көндез 19-24 градус җылы булачак. Төбәк территориянең күпчелек өлешендә явым-төшем ихтималы аз, бары тик ерак көнбатыш өлештә генә кичкә таба яңгырлар ява башлаячак — бу «чираттагы атмосфера фронты килүгә бәйле».

Чәршәмбе, 9 октябрьдә, циклонның атмосфера фронтлары йогынтысында Татарстанда яңгыр явачак, ә кайбер районнарда көчле яңгырлар көтелә. Көньяктан искән җил төньяк-көнчыгышка үзгәрә, температура төшә башлый. төнлә һава температурасы 7-12, көндез 11-16 градус җылы була.

Пәнҗешәмбе, 10 октябрьдә циклонның көньяк-көнчыгышына таба күчүе аркасында, республика аның тыл өлешендә кала, ә соңыннан төньяк антициклон агымы тәэсиренә эләгәчәк. Яңгырлар дәвам итәчәк — төнлә бөтен җирдә, ә көндез күбесенчә көньяк һәм көнчыгыш районнарда явачак. Сизелерлек суыта да: төнлә 3-8 градус җылы булса, көндез 5-10 градустан да артмый. «Төньяк-көнчыгыштан секундына 15-17 метр тизлектә көчле җил исәчәк», — дип хәбәр итә синоптиклар.

Атна ахырында Татарстанда бик салкын төньяк антициклон таралачак. Атмосфера басымының интенсив үсеше аркасында, явым-төшемнәр көтелми, ә һава температурасы көндез 3 градустан 8 градуска кадәр күтәрелә. Ялларда төнлә һава температурасы −1...-6 градуска кадәр төшә. Көндез дә температура нормадан 4-5 градуска түбән була.