Татарстанда 32 йөкле студент кыз 100 мең сум түләү сорап мөрәҗәгать иткән

Татарстанда 32 йөкле студент кыз 100 мең сум күләмендә бер тапкыр бирелә торган яңа түләү алуга гариза биргән. Бу хакта ТР Хезмәт министрлыгында хәбәр иттеләр.

Ярдәм чарасы Республика башлыгы инициативасы белән оештырылган һәм 2025 елның 1 гыйнварыннан соң йөклелек буенча учетка баскан хатын-кызларга каралган.

Гаризалар яшәү урыны буенча Республика матди ярдәм үзәгенең бүлекчәләрендә йөклелекнең 12 атнасыннан башлап, әмма бала табу датасыннан да соңга калмыйча кабул ителә.