Татарстан буенча Социаль фонд бүлеге телефон мошенниклыгы очраклары арту турында искәртә

Явыз ниятле мошенниклар республикада яшәүчеләргә шалтырата, үзен социаль фонд хезмәткәре дип таныштыра һәм пенсия алу өчен хезмәт стажы җитәрлек дәрәҗәдә түгел, дип белдерә. Бу хакта Россия Социаль фондының ТР буенча бүлеге матбугат хезмәте хәбәр итә, дип яза «Татар-информ».

«Мәгълүматларны раслау өчен билгесез кешеләр Россия Социаль фондының ТР буенча бүлегенә яки Күпфункцияле үзәккә кабул итүгә язылырга куша, ә аннары SMS-хаттагы кодны атауны сорый. Фонд хезмәткәрләре мондый сөйләшүләрне шундук туктатырга куша, чөнки сүз мошенниклар турында бара», — дип билгеләделәр матбугат хезмәтендә.

Россия Социаль фондының ТР буенча бүлеге хезмәткәрләре телефон аша шәхси мәгълүматлар, банк карталары номерлары, SMS-хаттагы парольләр һәм кодларны сорамый. Сезгә мондый сораулар белән шалтыратсалар, уяу булыгыз. Бу хакта өлкән яшьтәге туганнарыгызга һәм танышларыгызга хәбәр итегез, дип өстәделәр матбугат хезмәтендә.

Россия Социаль фондының ТР буенча бүлеге җитәкчесе Эдуард Вафин ассызыклаганча, фондның барлык хезмәтләре клиент хезмәтләре, Күпфункцияле үзәк яки Дәүләт хезмәтләре порталы аша гына күрсәтелә.

«Безнең хезмәткәрләр нинди дә булса түләүле хезмәт күрсәтүне тәкъдим итеп гражданнарның йортларына килеп йөрми, барлык хезмәтләр тулысынча бушлай күрсәтелә», — дип билгеләде ул.