Татарстан актеры «Ника» кинопремиясе лонглистына эләккән

Татарстан актеры, Илназ Гаффанов «Җылак» фильмында икенче пландагы роле өчен «Ника» милли кинопремиясе лонглистына эләкте. Исемлек премиянең рәсми сайтында бастырылган.

22 яшьлек Илназ Гаффанов Гыйләҗев исемендәге Яр Чаллы драма театрында эшли.

Режиссер Алмаз Нургалиевның «Җылак» фильмы актер Азһәр Шакировка багышланган. Илназ Гаффанов аның яшь чагын уйный. Бу — Чаллы актеры өчен дебют.

«Ника» номинантларын соңрак Россия кинематография сәнгате академиясе әгъзалары тавыш бирү нәтиҗәләре буенча игълан итәчәкләр. Регламент нигезендә, һөнәрләре буенча номинацияләрдә академиклар өчтән артык кешене билгеләп үтә алмый. Тавыш бирү ике турда узачак.