Социаль фондта ана капиталын балаларга белем бирүгә ничек юнәлдерергә икәнен аңлаттылар

РФ Социаль фондының ТР буенча бүлеге ел башыннан бирле бу максатларга республиканың 1,5 мең гаиләсенә 99 миллион сумнан артык акча күчергән, дип хәбәр иттеләр «Татар-информ» агентлыгына учреждениенең матбугат хезмәтендә.

«Ана (гаилә) капиталы программасы гамәлдә булган елларда 50 меңнән артык кеше балаларга белем бирүгә 2,6 миллиард сумнан артык акча юнәлдергән, шул исәптән быелның башыннан 1,5 меңнән артык кеше 99 миллион сумнан артык акча сарыф иткән», — дип белдерделәр бүлекчәдә.

Ана капиталы ярдәмендә гаиләләр теләсә кайсы белем бирү оешмасында — балалар бакчасы, көллият һәм университетта баланың укуына түли ала. Моннан тыш, ана капиталы белән чит телләр өйрәнү һәм машина йөртү курслары, иҗат, спорт дәресләре, репетиторлар хезмәте өчен дә түләргә мөмкин. Әмма бала укый торган оешманың белем бирү эшчәнлегенә лицензиясе булырга тиеш.

Дәүләт ярдәме акчаларын үзеңнең һәм уллыкка алынган балаларның укуына юнәлтергә мөмкин. Балага белем бирү учреждениесенә кергән вакытта 25 яшь тулмаган булырга тиеш.