Сәнгатьнең тәэсир көче

Марат Әфләтуновны (сулда) Татарстанның халык рәссамы Мөдәррис Минһаҗев тәбрикли / Фото шәхси архивтан

Ак-кара графика – ул тамашачы белән һәрвакыт ихлас сөйләшү. Монда артык төсләр юк: бары тик сызыкларның чисталыгы, төгәл уйланылган композиция һәм шәһәр тормышының туктаусыз хәрәкәте генә. Марат Әфләтунов иҗаты – шәһәребезнең үзенә генә хас «симфониясен» тотып алырга омтылыш.

Күргәзмәне ачу тантанасында мәртәбәле кунаклар да катнашты. Алар арасында Казаннан махсус килгән Татарстан Республикасының халык рәссамы Мөдәррис Минһаҗев, күптән түгел 80 яшьлек юбилеен билгеләп үткән Түбән Каманың Мактаулы гражданы Равил Шияпов, шулай ук Татарстан һәм Россиянең атказанган архитекторы, Габдулла Тукай исемендәге дәүләт премиясе лауреаты, Түбән Каманың Мактаулы гражданы Фирдавис Ханов һ.б. бар иде.

Кунакларның һәркайсы күргәзмә авторын котлап, аңа иҗади уңышлар һәм яңа казанышлар теләде. Татарстанның атказанган мәдәният хезмәткәре Римма Островскаяның чыгышы да кичәнең тагын бер матур бизәге булды. Аның скрипкада башкарган музыкаль номерлары күргәзмәнең сәнгатьчә тәэсирен тагын да көчәйтеп җибәрде.

Чараны оештыручылар бу кичәне уртаклашырга килгән барлык кунакларга рәхмәт белдерде. Тамашачыларның ихлас кызыксынуы һәм оста иҗатына карата соклануы күргәзмәгә аерым бер рух өстәде.