Россия Социаль фондының Татарстан бүлеге мошенникларның киң таралган схемаларын атады

Татарстанда кешеләргә мошенникларның Россия Социаль фондының Татарстан бүлеге хезмәткәрләре исеменнән шалтырату һәм алдау юлы белән шәхси мәгълүматны белергә тырышу очраклары ешайды.

«Пенсионерлар Россия Социаль фонды хезмәткәрләре исеменнән билгесез кешеләр шалтыратуы һәм пенсияләрне яңадан исәпләү турында сөйләве турында хәбәр итә. Мошенниклар «пенсияне яңадан исәпләргә ярдәм итәргә» тәкъдим итә, кайвакыт WhatsApp кушымтасы аша шалтырата, анда социаль фонд логотибы күренә. Шулай ук кайвакыт җитәкче яки аның урынбасарлары исеменнән телеграмда спам тарату бара», — дип сөйләделәр «Татар-информ»га Россия Социаль фондының Татарстан бүлеге матбугат хезмәтендә.

Ведомствода кисәтүләренчә, Татарстанда яшәүчеләргә кем дә булса социаль фонд хезмәткәре исеменнән шалтырата, пенсияне яки башка социаль түләүләрне ачыклау яки яңадан исәпләү өчен шәхси мәгълүматларны әйтергә куша икән, моны эшләмәскә кирәк. Билгесез кешеләргә шәхси мәгълүматларны атарга ярамый.

«Таныш булмаган яки шикле номерлардан килгән шалтыратуларга җавап бирмәгез. Таныш булмаган кешеләргә Дәүләт хезмәтләре сайтындагы шәхси кабинетка керү паролен, паспорт мәгълүматларын, банк картасы номерын һәм аның ПИН-кодын хәбәр итмәгез», — дип аңлаттылар матбугат хезмәтендә.

Әгәр гражданинга телефон аша шәхси кабул итүгә язылырга, аннары моны смс-код белән расларга тәкъдим итәләр икән, димәк бу мошенниклар. Россия Социаль фонды сайтында «Алдан язылу» дип аталган электрон сервис эшли. Анда клиент хезмәте алу өчен мөрәҗәгать итүнең уңайлы көнен һәм вакытын сайларга мөмкин.

«Россия Социаль фондының Татарстан бүлеге хезмәткәрләре телефон аша шәхси мәгълүматларны сорамый, сылтамалар һәм СМС-хәбәрләр җибәрми. Барлык хезмәтләрне Социаль фондның төбәк бүлеге клиент хезмәтләрендә, Күпфункцияле үзәктә яки Дәүләт хезмәтләре порталы аша алырга мөмкин», — дип аңлатты Россия Социаль фондының Татарстан бүлеге җитәкчесе Эдуард Вафин.