Прокуратура Каенлы һәм Түбән Афанасово авылларындагы фермаларда хокук бозуларны ачыклаган

Түбән Кама шәһәр прокуратурасы Каенлы һәм Түбән Афанасово авылларында яшәүчеләрнең шикаятьләреннән соң «Орсис-Агро» җәмгыятенә карата тикшерү уздырды. Бу хакта ведомствоның матбугат хезмәте хәбәр итә.

«Каенлы» терлекчелек комплексын тикшерү барышында күзәтчелек органы хезмәткәрләре терлекчелектәге өстәмә продуктларны махсус мәйданчыкта түгел, ә туфракның югары уңдырышлы катламында туплау һәм саклау фактын ачыклый.

Нәтиҗәдә, «Орсис-Агро» җитәкчесе адресына күрсәтмә бирелә, аны карау нәтиҗәләре буенча хокук бозулар бетерелә, гаепле вазифаи зат дисциплинар җаваплылыкка тартыла. Моннан тыш, «Каенлы» фермасы башлыгына карата КоАПның 10.8.1 маддәсенең беренче өлеше буенча административ эш кузгату турында карар чыгарыла.

Түбән Афанасовода яшәүчеләр социаль челтәрләрдә күп балалы гаиләләрнең «Акчарлак» бистәсендә начар исле билгесез матдәнең бушатылуы турында хәбәр итә. Россельхознадзор белгече белән берлектә тикшергәннән соң, прокуратура ППЖ саклау таләпләрен үтәмичә генә туплау фактын ачыклый.

Нәтиҗәдә, «Орсис-Агро» адресына әлеге факт буенча хокук бозуларны бетерү турында тәкъдимнәр кертелә, «Афанасово-Новый» терлекчелек комплексы башлыгына карата КоАПның 10.8.1 статьясының беренче өлеше буенча административ эш кузгату турында карар чыгарыла. 

Шул ук вакытта Татарстан Республикасы Экология министрлыгы тарафыннан «Афанасово-Новый» фермасы тирәсендәге һава пробаларына ясалган анализ норманың артуын күрсәтмәгән. Россельхознадзорның август аенда зыян китерү мәсьәләсенә экспертиза үткәрү өчен алынган туфрак үрнәкләренә анализ ясау да көтелә.

Фото: шаһитлар