Оборона министрлыгының Татарстандагы хәрби вәкиллеге башлыгын коррупциядә гаеплиләр

Татарстанда көч структуралары хезмәткәрләре аеруча зур күләмдә ришвәт алуда гаепләнүче Россия Оборона министрлыгының Хәрби вәкиллеге башлыгын тоткарлады.

«Татар-информ» га Россия Федераль куркынычсызлык хезмәтенең ТР буенча идарәсе матбугат хезмәтендә сөйләгәнчә, ир-ат Кырымда һәм СВО уздыру зонасында Оборона министрлыгы ихтыяҗлары өчен гомуми гаскәр билгеләнешендәге автомобильләрнең техник күзәтчелеге турындагы дәүләт контракты буенча документларны килештерүдә ярдәм иткән өчен ришвәт алган.

«Ришвәт алу» һәм "дәүләт оборона заказын үтәгәндә вазыйфаи вәкаләтләрдән явызларча файдалану" маддәләре буенча җинаять эше кузгатылды. Тикшерү эшләре дәвам итә.