Картадагы адрес буенча: Татарстанда үз җәмәгать судьяңны бер минут эчендә ничек табарга

Үзләренең территориаль суд участогы адресын ничек билгеләргә дигән сорау белән еш мөрәҗәгать иткән гражданнарга уңайлы булсын өчен, республика Юстиция министрлыгы махсус онлайн-сервис кулланырга киңәш итә.

Җәмәгать судьялары эшчәнлеген оештыру-хокукый тәэмин итү бүлеге башлыгы Юлия Михайлова аңлатканча, иң гади ысул — Татарстан Республикасы җәмәгать судьяларының рәсми порталындагы интерактив картадан файдалану.

«Порталда «Территориальная подсудность» вкладкасы бар, анда интерактив карта тәкъдим ителгән. «Адрес или объект» эзләү юлында үз адресыңны кертергә һәм «Найти» төймәсенә басарга кирәк. Система автомат рәвештә тиешле суд участогын күрсәтәчәк», — дип сөйләде Юлия Михайлова.

Адрес кертелгәннән соң, кулланучы тулы мәгълүмат алачак: участок номеры, аның адресы, кабул итү графигы һәм җәмәгать судьясы битенә турыдан-туры сылтама. Бу сервис кирәкле суд участогын тиз һәм төгәл билгеләргә мөмкинлек бирә, бу гадел хөкем артыннан мөрәҗәгать итү процедурасын гадиләштерә.