Бүген Татарстанда яшенле яңгыр, боз явуы һәм көчле җил көтелә

Бүген, 29 майда, Татарстанда һава шартлары җитди бозылу сәбәпле шторм кисәтүе игълан ителде. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

15.00 сәгатьтән 22.00 сәгатькә кадәр республиканың төньягында һәм көнчыгышында актив атмосфера фронты узган вакытта урыны белән яшенле яңгыр, боз явуы һәм җилнең тизлеге секундына 15-20 метрга (урыны белән — 24 метрга) кадәр көчәюе көтелә.

Элегрәк «Татар-информ» агентлыгы Татарстанда һава температурасының күтәреләчәге, яшенле яңгырлар явачагы хакында хәбәр иткән иде.

Бофорт шкаласы нигезендә, секундына 13,9-17,1 метр тизлектәге җил — көчле, 17,2-20,7 метр тизлектәгесе — бик көчле, 20,8-24,4 метр тизлектәгесе давыллы җил дип атала.