Агымдагы елда Татарстанда бала табу сертификатларыннан җиде мең ярым ана һәм сабый файдаланды

Агымдагы елда Татарстанда бала табу сертификатларыннан җиде мең ярым ана һәм сабый файдаланды. Әлеге максат өчен медицина оешмаларына күчерелгән акча күләме 84,5 миллион сумнан артык тәшкил итә. Акча йөклелеккә һәм балалар тууга бәйле рәвештә күрсәтелгән хезмәтләр өчен түләүгә юнәлдерелгән. 

Бала табу сертификаты — ул йөкле хатынга бала табу, шулай ук йөклелек вакытында һәм аннан соңгы чорда күзәтү үтү өчен медицина оешмасын сайлау хокукын бирә торган документ. Электрон сертификат, яшәү урыны буенча беренче тапкыр мөрәҗәгать иткәндә, хатын-кызлар консультациясендә яки бала тудыру йортында формалаштырыла. Сертификатны шулай ук балага профилактик тикшерүләр үткәреләчәк балалар поликлиникасы да рәсмиләштерергә мөмкин. 

Түләүне билгеләү өчен кирәкле барлык мәгълүматларны Социаль фонд автомат рәвештә ала. Әлеге исемлеккә йөкле хатынны хатын-кызлар консультациясендә исәпкә кую, бала тудыру процессының уңышлы узуы, шулай ук бер яшь тулганчы ел дәвамында балага профилактик күзәтү үткәрү буенча хезмәтләр күрсәтелү турындагы мәгълүматлар керә. 

«Бала табу сертификатының электрон формасына күчү медицина хезмәткәрләренә документны тутыру процедурасын шактый гадиләштерде, ә хатын-кызларга үзләре белән кәгазь бланк йөртергә һәм күрсәтергә кирәклеген гамәлдән чыгарды», — дип билгеләде Татарстан Социаль фонды идарәчесе Эдуард Вафин.