Әдәбият яңалыклары

Күренекле язучы, драматург, Татарстанның атказанган сәнгать эшлеклесе, 14 китап авторы, Саҗидә Сөләйманова исемендәге әдәби премия лауреаты Фәтхулла Абдулла улы Абдуллинның «Без бит — Яңа Сәетләр» дигән китабы дөнья күрде. 

Язучы бу китабын үзенең туган авылы Яңа Сәеткә, аның тарихына, күренекле шәхесләренә, тырыш-уңган авылдашларына багышлаган. Казан шәһәренең «Халкыбыз мирасы» нәшриятында сыйфатлы кәгазьдә басылган, күпсанлы фотосурәтләрне, архив документларыннан күчермәләрне һәм истәлек-хатирәләрне үз эченә алган бу китап тиз арада үз укучыларын табар. 

Танылган шагыйрь, күп кенә җырлар авторы, Татарстан Язучылар берлеге әгъзасы дистәдән артык китап авторы, Татарстанның атказанган табибы Марс Хәмәтюныс улы Хафизов Саҗидә Сөләйманова исемендәге әдәби премиягә лаек булды.

Шагыйрьне әлеге олы бүләге белән котлыйбыз. Киләчәктә дә зур иҗат уңышлары телибез. Шигырь сөючеләрне шатландырып, әле тагын бик күп шигырьләр язарга, китаплар чыгарырга насыйп булсын! 

Шәһәрдәшебез Айдар Алфас улы Нуриев Татарстан Язучылар берлегенә кабул ителде. 

Ул Актаныш районының Югары Гәрәй авылында туып-үскән. Урта мәктәпне тәмамлаганнан соң Түбән Кама химия-технология институтында югары белем алган. Аның «Ни пычагыма!», «Эт тормышы», «Бер гомер» һ.б. повестьлары, хикәяләре «Казан утлары», «Мәйдан» журналларында һәм республикада нәшер ителүче башка матбугат битләрендә дөнья күрде. Айдар хәзерге вакытта Түбән Камада яши, эшмәкәрлек белән шөгыльләнә.

Фотолар шәхси архивлардан