Гуманитар ярдәм

Вячеслав Зевакин даими рәвештә гуманитар йөк ташый. Маршруты - Түбән Кама-Лисичанск. Ир-ат Луганск өлкәсендә урнашкан шәһәрнең ничек яшәвен үз күзләре белән күргән. Гап-гади мөмкинлекләрдән мәхрүм булган халыкның язмышы әрнетә аның җанын... Үз-үзенә сүз бирә - айга ике тапкыр булса да, анда яшәүчеләргә һәм хәрбиләргә кирәк әйберләр илтеп тапшыру. 

Бүген дә фура йөртүчесе юлга кузгалырга әзерләнә. Битараф булмаган түбәнкамалылар тырышлыгы белән 5 тонна гуманитар йөк җыела. Кием-салымнан алып төзелеш материалларына кадәр. Әлеге изге эшкә эшмәкәрләр, оешма-предприятие хезмәткәрләре һәм гади халык зур өлеш кертә. 

"Без Химиклар проспектындагы 72Г адресы буенча урнашкан пунктка кирәк-яраклар алып барабыз. Бу изге эшкә волонтерлар да кушыла. Барлык әйберләр дә урынга барып җитсен. Солдатларыбыз исән-имин әйләнеп кайтсын дигән теләктә калабыз", - ди Фәридә Сәләхова. 

Билгеле булганча, Татарстан Лисичанскны шефлыкка алган. Безнең белгечләр шәһәр инфраструктурасын торгызу һәм төзекләндерү эшләрен алып бара.