Болай гына калдырмаслар

«Йорт диварында ярыклар барлыкка килгән, ишегалды тиешенчә яктыртылмый, уен мәйданчыгы балалар өчен куркыныч! Шул да булдымы төзекләндерү?!» – дип ачулана кешеләр. Ике ел элек эшчеләр килеп, йортның ян-як диварларын җылытканнар. Төзекләндерү шуның белән тәмамланган да.
– Якындагы йортның фундаментын рәтләделәр, бинаны тышладылар, буядылар, ә без кемнән ким? – ди 30 нчы йортта яшәүче Лидия Ткачева.
Ишегалдына урнаштырылган яңа балалар мәйданчыгы да ошамый. Корылмаларның нигезләре бетон белән катырылмаган, шуңа күрә монда уйнау куркыныч.
– Чүплекне дә аерып куяга ки-рәк, юкса балалар төзелеш чү-бен уен мәйданчыгына ташый, – ди Әлфирә Баһавиева.
Җирле идарәче компаниядә мәсьәләләрне хәл итәргә вәгъдә бирделәр. Әйтик, балалар мәйданчыгын шушы көннәрдә ныгытачаклар, чүплекне дә тәртипкә китерәчәкләр, ишегалдын яктырту буенча эшләр башкарылыр.
Йортта тараканнардан дезинфекция ясаячаклар. Ә менә капиталь ремонт турында онытырга туры киләчәк.
– Төзекләндерү эшләре ике ел элек башкарылды. Программага ян-як диварларын ныгыту гына кергән иде, – ди «Жилье» идарәче компаниясенең баш инженеры Сергей Скучаев.
Шулай да, йорт халкы вәгъдәләр үтәлер дип өметләнә. Кешеләр капиталь төзекләндерү мәсьәләсен кабат күтәрәчәкләрен дә белдерделәр.

Лилия Заһретдинова

Фото https://ntr-24.ru/ сайтыннан алынды