Башына — йозак белән

25 октябрьдә, төн уртасы якынлашканда, Түбән Кама эчке эшләр идарәсенең дежур бүлегенә Тынычлык урамындагы 8нче йорт янында канга баткан, җан әсәре сизелмәгән ир гәүдәсе ятуы турында хәбәр алына.
Шул урынга килгән полиция хезмәткәрләре әлеге мәетнең кемнеке булуын тиз ачыклыйлар. Ул - шәһәрнең бер автомастерскоенда слесарь булып эшләгән 54 яшьлек түбәнкамалы була. Суд-медицина экспертизасы әлеге ирнең башындагы күпсанлы җәрәхәтләрдән үлгәнлеген билгели.
Җинаятьчеләрне эзләү бүлеге хезмәткәрләренә үтерүчене тоту өчен нибары тәүлектән дә кимрәк вакыт кирәк булган. Сорашу барышында, үтерелгән кешенең, алдагы көндә эштән соң, шахмат уйнау нияте белән, бер танышының гаражына килүе мәгълүм була. Уен барышында алар аракы да эчкәннәр. Җинаятьне эшләүдә шикләнелеп кулга алынган 65 яшьлек гараж хуҗасы сүзләренә караганда, гаражда алар арасында низаг килеп чыккан һәм ул танышының башына 10 мәртәбә амбар йозагы белән суккан. Аннан соң җансыз гәүдәне автомобиленә салып, Тынычлык урамындагы 8нче йорт янына илтеп ташлаган.
Гаражның идәнендә һәм стенасында, шулай ук, машина багажнигында үлгән кешенекенә туры килә торган кан таплары тапканнар. Гараж хуҗасы үз гаебен тулысынча таныган. Хәзерге вакытта ул сак астында. Үлгән кешенең дә, шулай ук, аны үтерүченең дә элек җинаять җаваплылыгына тартылганнары булмаган.