Түбәнкамалыларны әдәби-музыкаль кичәгә чакыралар

Габдулла Тукай исемендәге үзәк китапханәдә, 10 мартта 13.00 сәгатьтә «Вәт өчпочмак» проекты кысаларында узучы «Моңнар ява...» дигән әдәби-музыкаль кичә була. 

Очрашу кунаклары — озак еллар 2 нче китапханә мөдире булып эшләгән, хәзер Казан шәһәрендә яшәүче 5 китап авторы Альбина Мортазина, «Мунча ташы» татар эстрадасы театрының сәнгать җитәкчесе, Татарстанның халык артисты Гамил Әсхәдулла һәм автор-башкаручы, популяр җырлар авторы, композитор Рамил Әсхәдулла. «Китапханәбезгә рәхим итегез! Шунда ук «Үзебезчә языйк әле...» дигән күргәзмә белән дә танышып, көнегезне файдалы һәм матур итеп уздырыгыз», — дип белдерде китапханәнең бүлеге мөдире Әнфисә Фәйзетдинова.