«Татарстанның чиста урманнары» акциясе 22 апрельдә башлана

«Татарстанның чиста урманнары» табигатьне саклау акциясенең язгы этабы 22 апрельдән 22 июньгә кадәр узачак. Ике ай эчендә урманнардан кыш буена җыелган чүп-чар, корыган агачлар, чыбык-чабыклар җыеп чыгарылачак, дип яза «Татар-информ».

Акциядә катнашучылар беседкаларны төзекләндерәчәк, мәгълүмат такталары һәм аншлаглар куячак. Акция турында бүген Казанда узган брифингта Татарстан урман хуҗалыгы министры урынбасары Рәис Гомәров сөйләде.

«Акциянең төп максаты — республика урманнарында уңай санитар-экологик мохит булдыру, урман фондында урнаштырылган кече архитектура формаларын төзекләндерү», — дип аңлатты ул.

Узган елда «Татарстанның чиста урманнары» акциясендә федераль һәм төбәк юллары яныннан чүп-чар җыю оештырылган. Барлыгы 1,3 мең куб. метр каты көнкүреш чүп-чары җыеп чыгарылган, 5,7 мең куб. метр корыган һәм ауган агачлар күчләргә җыелып, черетүгә калдырылган.