Түбән Кама суды интернат-йортта ремонт ясауны таләп итте

Түбән Кама шәһәр прокуратурасы Кама Аланы интернат-йортында психик тайпылышлы кешеләр өчен санитар-эпидемиологик закон бозуларны ачыклаган.

Сүз учреждениенең кайбер бүлмәләрендә стеналарның, идәннең һәм түшәмнең ярыклары һәм башка зарарланулары турында бара. Моннан тыш, азык-төлек блогының суыткыч җиһазында контроль термометр булмаган, диелә суд материалларында.

Прокуратура фикеренчә, табылган хокук бозулар интернат-йортта яшәүче кешеләрнең сәламәтлегенә куркыныч тудыра. Прокуратура ачыкланган хокук бозуларны бетерүне таләп итеп, дәгъва белән судка мөрәҗәгать иткән.

Түбән Кама шәһәр суды дәгъваны тулысынча канәгатьләндерә һәм «психик тайпылышлы гражданнар өчен билгеләнгән Кама Аланы интернат-йортын» биналарны ремонтларга һәм контроль термометр урнаштырырга мәҗбүр итә.