Сәламәт яшәү рәвешен алга сөреп

Ярышларда мәктәп укучылары, студентлар, заводта эшләүчеләр, оешма хезмәткәрләре, пенсионерлар, спортчылар һәм, әлбәттә, үзләре теләгән һәр-кем катнашты. Яшь үзенчәлекләре буенча да аерма зур булды: катнашучыларның иң яше - 9 яшьлек Евгений Иванов, ә иң өлкәне - 86 яшьлек Анатолий Елагин.

Ярыш 11.00 сәгатьтә ачылып, шәһәр башкарма комитеты җитәкчесе Денис Баландин һәм муниципаль район башкарма комитеты җитәкчесе урынбасары Айдар Фәретдиновның тәбрикләү сүзләреннән соң, чаңгычылар стартка басты. Гомуми ярышларда катнашучылар өчен 1,5 километрлы дистанция билгеләнсә, 5 километрлы дистанциядә һөнәри спортчылар җитезлектә көч сынаштылар. Җиңүчеләр яшь буенча дүрт категориягә бүленде: 2000 елда туганнар һәм аннан яшьрәк кызлар арасында - Анна Чумакова, шул ук яшьләрдәге егетләр арасында - Владислав Трошкин, 1999 елгы һәм аннан өлкәнрәк хатын-кызлар арасында - Елена Дектерева, шул яшьләрдәге ир-егетләр арасында Илнур Сафин беренче урынны яулады. Хәер, бу ярышта иң мөһиме җиңү түгел, ә катнашу. Чөнки чаңгычылар бернинди бүләкләр белән дә алмаштырып булмый торган күңел күтәренкелеге алдылар, сәламәт яшәү рәвеше алып баруларын расладылар.