Чираттагы уеннар

Континенталь хоккей лигасы чемпионатында катнашучы «Нефтехимик» командасы узган атнада ике уенны үз бозында үткәрде.

26 гыйнварда безнекеләр «Спартак» (Мәскәү) командасын кабул итте. Уенның төп вакыты 1:1 исәбе белән тәмамлангач, овер-тайм ) бирелде, әмма исәп үзгәрмәде. Шуннан соң буллитлар билгеләнеп, «Нефтехимик» капитаны Максим Пестушко беренче булып уңышка иреште. Шулай итеп, хуҗалар 2:1 исәбе белән җиңде.

28 гыйнварда безгә чираттагы кунак - «Витязь» (Чехов) килде. Бу уен бик авыр барды, кунаклар гел алга чыгып, безнекеләр көч-хәл куып җитте, һәм уенның төп вакыты тигез исәп белән тәмамлана бугай, дип торганда, «Нефтехимик» уенчысы Егор Миловзоров гол кертте. Нәтиҗәдә - 4:3 исәбе белән җиңү.

Шәһәребездәге әлеге уеннарда «Нефтехимик» көндәшләрен җиңә алса да, плей-оффка уза алачагына өмет бик кечкенә, чөнки аның өчен турнир таблицасында кимендә сигезенче урынны алырга кирәк, ә безнекеләр тугызынчы урыннан югарырак күтәрелә алмый әле.