Рәхмәт йөзеннән бүләкләр

Икенче курста укучы егетләр һәм кызлар хәзерге вакытта «кызыл зона»да эшләп, авыруларның гомерләрен саклаучы госпиталь хезмәткәрләренә рәхмәтләрен җиткерделәр. Студентлар аларга көнкүреш, шәхси гигиена әйберләре, сөлгеләр, урын-җир кирәк-яраклары, тәм-томнар алып килделәр.
Бүләкләр хәйрия акциясе вакытында җыелган. Анда медицина көллиятенең барлык укытучылары һәм студентлары катнашкан.
– Акциядә студентларыбыз һәм укытучылар бик теләп катнашты. Бу чара – табибларга рәхмәт әйтер өчен бик яхшы мөмкинлек. Күбебезнең туганнарын һәм якыннарын, көллиятнең берничә укытучысын бу авыру читләтеп үтмәде. Көн саен йөзләрчә гомерне саклап калучы медицина хезмәткәрләренә рәхмәтебезне җиткерәбез, – ди көллиятнең биология фәне мөгаллимәсе Ольга Шәмсетдинова. 

Үзиреклеләр «чиста зона»га барырга теләүләрен дә әйттеләр.

Екатерина Полякова,
Түбән Кама үзәк хастаханәсенең җәмәгатьчелек белән элемтә
буенча белгеч

Фото үзәк хастаханә сайтыннан