Түбән Каманың Лемаев скверы янындагы җәяүлеләр кичүендә өч камера куелды

Түбән Камада шушы көннәрдә генә Лемаев скверы янындагы җәяүлеләр кичүендә өч камера куелды. Тагын шундый ук өчәү — Химиклар проспектының каршы ягында да бар. Аларның һәрберсе үз функциясен үти.

«Монда гомуми күренешне, җәяүлеләр кичүен һәм автомобиль номерларын терки торган өч камера урнаштырылган», — дип аңлатты «Мәгълүмат үзәге» директоры Максим Шаронов.

Түбән Камада «Имин шәһәр» программасын гамәлгә ашыру дәвам итә. Ул 2015 елда башланды, соңгы ике елда зур үсеш алды. 2023-2024 елларда Түбән Кама урамнарында 250 югары технологияле камера куелган.

«Имин шәһәр» программасы буенча Түбән Камада төрле участокларда: юл чатларында, юл буйларында, тротуарларда, шәһәргә чыгу һәм керү урыннарында 305 камера урнаштырылган, алар вәзгыятьне күзәтеп кенә калмый, шулай ук кешеләрне танып белү функциясенә дә ия, ягъни аларның төп функциясе — конкрет кешеләрне һәм транспорт чараларын идентификацияләү һәм эзләү.

Быел өч программа буенча шәһәрдә барлыгы 430 камера урнаштырылган. Бу шул исәптән ишегалларында да, яңа иҗтимагый киңлекләрдә дә. Күзәтү системасы бөтен Түбән Каманы колачлый.

«Шәһәр территориясендә, гомумән алганда, 4815 камера куелды. Алар өч программа кысаларында: «Җәмәгать киңлекләре», «Имин ишегалды», юл инфраструктурасындагы һәм халыкның күпләп җыела торган урыннарда куелды. Агымдагы елда 431 камера урнаштырылды», — дип билгеләп үтте Максим Шаронов.

«Имин шәһәр» программасы камераларыннан бөтен сурәт ситуация үзәгенә килә, ул эчке эшләр идарәсе бинасында урнашкан. Анда реаль вакытта урамнарда вәзгыятьне контрольдә тоту алып барыла, хокук саклау органнарының шәһәре уч төбендәге кебек диярлек.