Түбән Камада мобилизацияләнгәннәрнең гаиләләренә җәмәгать транспортында бушлай йөрү өчен карталар бирелә башлаган

Бу хакта «Эшлекле дүшәмбе» киңәшмәсендә шәһәр мэры урынбасары Марина Камелина хәбәр иткән.

Тиздән балаларга һәм өлкәннәргә социаль учреждениеләренә бушлай йөрергә мөмкинлек бирүче карталар кайтарылачак.

10 октябрьдән мобилизацияләнгәннәрнең балалары мәктәпләрдә бушлай ашый башлаячак. Искәртеп узабыз, Түбән Кама хакимияте мобилизацияләнгәннәрнең гаиләләренә ярдәм итү чараларының тулы бер комплексын билгеләгән, шул исәптән – муниципаль балалар бакчаларына, спорт секцияләренә һәм түгәрәкләренә, җирле хакимият органнарына буйсынган түгәрәкләргә һәм башка чараларга түләүсез бару.

12 октябрьгә кадәр махсус оператив штаб тарафыннан һәр гаиләгә социаль паспортны төзү эше тәмамланачак. Түбән Кама мэры Рамил Муллин мобилизацияләнгәннәрнең гаиләләрен шәхси контрольгә алырга, аларга нинди ярдәм кирәклеген белеп торырга кушкан.