Түбән Камада ярамаган урынга машина куйган өчен 5 миллион сум штраф салынган

Түбән Камада парковка кагыйдәләрен бозуны теркәү буенча «Ангел» мәгълүмат системасын сынау рәвешендә эшләтеп җибәргәннән бирле административ-техник комиссия 5,1 млн сум штраф салган.

Шуларның 2,9 миллионы түләтелгән. Түләнмәгән штрафлар буенча комиссия белгечләре инде суд приставлары белән хезмәттәшлек итә.

«Ангел» программа-аппарат комплексы белән эшләү вакытында 3740 автомобиль теркәлгән. Административ комиссия тарафыннан барлыгы 1928 материал каралган.

«Ангел» системасын сынау 2023 елның мартында башланды. Якын арада аны даими нигездә эшләтүне кертү планлаштырыла.